小紀向前走

20160227 春季郊遊樂@布萊頓、七姊妹崖 (下)

繼續繼續。尋晚太眼睏，個分界位有點亂黎，重新執過位，由抵達郊野公園再講過先！
上回講到我到站已經三點了（由屋企出發計用左六個鐘-_-）。
有興趣去埋睇崖既朋友我強烈建議留兩日，一日實在唔夠用……
可能我哩個HEA HEA柚手腳慢啦！
郊野公園門口有路線圖……要去睇Seven Sisters Cliffs有三條路可以選擇：
．Park Trail - 可行哂七個姊妹既頭頂；
．Beach Trail - 睇到兩三個姊妹；
．Seaford Head View Point - 可睇哂七個姊妹。
View Point睇哂七個姊妹就當然最理想啦！但世事就係咁，最靚既地方就注定路程最遠咖喇……
因為時間關係，為免行到去已經日落西山，一個姊妹都睇唔到。
我決定忍痛地捨難取易，行Beach Trail啦！我都係要再黎多次咖喇～～～
一望無際綠草地，正呀～（可惜天唔夠藍草唔夠綠，所以夏天一定要再黎！野餐！）
事不宜遲，立刻向前走不回頭！（植入式口號hahaha）
沿路都係草原，人唔算太多，亦唔會太少。風景優美，遠離煩囂，感覺特別寧靜舒服。
有唔少狗仔在散步。
亦會不時見到綿羊群
草原中既小屋，好童話。
TA-DA- 中間白色就係七姊妹斷崖喇！其實比我想像中快，半個鐘左右就去到石灘了。
只睇到兩三個Sisters… 好過無。天開始有點黑。
七姊妹崖係位於英倫海峽既七個白堊斷崖。
聞說係白堊紀時期已經形成！即係我爬上去既時候衣服沾上既係一億年前既泥土！！！（我暈了）
不過！我覺得相片完全影唔覺到現場既宏偉……我略盡綿力啦。
有些風景，始終是要親眼所見，有些經歷，始終是要親身感受。
總之下次一定一定一定要睇哂七個Sisters！
石春路十分難行。
另一邊，景觀都唔錯。
響度識左兩個西班牙女仔，一齊由崖底爬上崖頂。（沿住白色路段）
無碌返落山，都算係生死之交！
上到崖頂視野更加廣闊。如果唔係要咁耐先黎到，我應該會成日黎咖。
左邊兩個就係新識既西班牙女仔，兩個都係Year 3學生。
佢地話我個樣似21，知道我真實年齡之後仲露出難以至信既表情添，哇哈哈哈哈哈哈。
西班牙女仔同我講話可以行哂七個崖頂，去到遠處既Light House～
後來我上網睇，其實可以搭巴士去的。
我宜家已經計畫好下次黎既路線喇：先行去View Point，再搭返巴士去Light House！一於咁話！
有人坐在崖邊看風景。（無攔杆，有點牙煙。）
仲有人砌左心心，Sweet Sweet～～
我就曬下就黎落山既太陽，真係好舒服呀哩度～～～
沿住Park Trail落山，日落嚕。
比佢發現左我偷拍添～～哈哈
好可愛呀你～～～～～
落山搭１２號慢車，站站停，個幾鐘先到。
Bus pass係經Brighton & Hove Buses App買的，1 Day Pass £4.2。
由4:30am至4:30 am，自動計時。
上車時比部電話司機睇就得咖喇～～
我爬文見其他人都係買紙既Bus Pass，係刮刮咭，都幾過癮。
不過我無去Tourist Office就無買到了。
起巴士告別新朋友後，我就去返Brighton Pier。已經六點了。又見到Small Ben～～
海岸邊的摩天輪，亮燈後更靚！
遊樂場～～
後巷都咁靚。
Skip左Lunch，肚子很餓，又係時候揾食。
Yelp左第一間Riddle and Finns… 無位了。不過見到餐牌都幾吸引，又要留返下次了。
Yelp左第二間叫Hop Poles……去到門口，噫喂，Pub黎既？一個人去Pub真係怪到無人有。
我諗左一分鐘，又比肚餓戰勝理智，唔理咁多入去啦～
黎到海邊就梗係要食海鮮啦！所以我嗌左……Fish & Chips！！！！（哈哈哈，其實尋日先食完。）
不過好一般，魚同薯條都唔夠脆。Yelp有4.5星，到底係咪靠酒精欏返黎既呢？？？？
食飽仲有時間周圍逛。
周圍有好多好Artistic既小店～～（當然全部關哂門啦）
話說我係個騎呢既人，最鐘意就係哩類騎呢既小品。
狐狸先生幾多點……？
蛋形燈
去到巴士站，一個人都無。原來我記錯左時間，唔係8:20… 而係8:40… 於是我又行多個圈。
人群陸續出現。等呀等，等呀等，等呀等。8:40司機仲係連影都未見。
周圍既人都開始凍到爆粗同露出焦慮既神情。
因為你唔知個司機到底會唔會黎！！！仲要唔要無了期等落去好！！！
係咪要響度過夜？？係咪要買火車飛？？
Brighton Coach Station真係過份簡陋……
一般黎講Coach Station都會有Ticket Office（連職員）、有室內候車室……
最重要係——有顯示巴士到站時間咖嘛。
連普通巴士站都有喇，唔明點解Coach Station竟然會無。
如果唔係有咁多人，真係會以為自己記錯時間……
好彩聽日星期日，我都唔算太焦慮。突然記得帶來既提子仲未吃，於是我就坐響巴士站度食食食。
（哈哈哈……我份人真係勁怪。）
OK，結果架車成9:00先到！！！！！！！！！！！！！！！！凍到結冰了。
不過回程無停站，所以快好多。十一點半就返到屋企嚕～～
最後送上合照！！！！！！
早抖~~

20160227 春季郊遊樂@布萊頓、七姊妹崖 (上)
雖然現在已經夜深，但係好想寫左先！
費事過左啖氣～～～
今日去左Brighton & Seven Sisters
前者好歡樂、繽紛
後者好平靜、舒服
今朝本身買左10點巴士飛既
其實巴士係慢既，2個半鐘先到，
但因為真係平過火車太多（來回£12），
而且無抱有好大期望，
諗住無咩做八個鐘都夠皮喇掛？！
但係出發前一日（其實即係尋日），
我朋友同我講話附近有個崖都好值得去。
上網爬下文，發覺車程要成個鐘，即係來回兩。個。鐘。
跟住都諗左好耐，去定唔去好呢？!
去？唔去？？去？？？唔去？？？？
一場去到都唔去睇下，
淨係留響市區好似浪費左。
所以都係決定GOGOGO！
點知！好衰唔衰，本身已經唔夠時間，我仲竟然唔知醒！！！！！
跑得唔夠快，遲左一分鐘，巴士開走了。
我即場呆左十幾分鐘(⊙ｏ⊙)
腦袋空白一片，好似老細問我野果時咁！！！！！
望下個天，雖然唔係好藍不過又唔算太差。
咁早起身成日流流長都唔知做咩好……
所以最後都係決定買多張單程飛，照去啦！（單程£11.7。傻的嗎。）
之前每次都在危急存亡之秋也時趕到，今次遲到的人終於受到教訓了。
下班車開11 am，見有時間，唯有去黎天王度食個早餐先。三文魚蛋包，咖啡（£3.95，抵！）
嗚...嗚...嗚...
出發！！！完全無影響心情，而且仲好期待～～～
中途停左好多個站，怪唔乜知咁耐先到啦！訓左一個鐘，醒來睇風景，嘩，好似渡假村！！
Brighton Coach Station就響Brighton Pier附近，算係不幸中之大幸！
因為今日唔諗住City Walk，打算到達後立即轉巴士去Seven Sisters，有得順路經過行個圈都算小Bonus～～
因為London無海，所以我都好耐無去過海灘嚕～～
Brighton Pier 出面有個小示威。
遇見Small Ben。Nice to meet you!!
諗住搭2:07班車，快速響Brighton影幾張～～十分大風。好彩有戴帽！
Brighton Pier其實係個遊樂場黎呢，有攤位遊戲，有機動遊戲。不過我快速遊走就無入去玩嚕。
跑去巴士站時回望，遠睇既Brighton Pier好靚啊！雖然唔係藍天，不過哩個光線都幾靚。
（係似乎就快天黑咁款者。哈哈。我今日先岩岩開始咋喂！！！）
（好彩宜家太陽晏返落山者～～～）
好鐘意有顯示到站時間既巴士站～好方便！勁口渴，満腦子都係可樂。
12X，見到仲有九分鐘，即刻Google Map揾超級市場，丫，又幾近喎！衝！
到手～～～
響英國成日見到黃色水仙，而且係用泥種而非用水浸，同香港好唔同。
12X已經係快車，都要差唔多成個鐘先到，去到已經三點了。
Seven Sisters Country Park就響巴士站對面，一落車就到咖喇～
綠色電話亭，令我諗起Coca Cola Life… （非植入式廣告）（哈哈）
。
。
。
唔得，都係太眼睏！(～﹃～)~zZ
——待續。